Dieđáhus 5.2.2019
Oažžu almmustahttit 5.2. dmu 8.00.
Veahčajogas 2017 lobiheamet bivdán guolásteaddjit leat viimmat mannamin gearregiidda. Lappi gearretriekti čoahkkana Ohcejogas 14.2.2019 dii 9 rájes. Gearregiin lobihis bivddus vástidit Veahčajogas stáhta čáhceviidodagas bivdán njeallje bivdi. Dálá lága mielde sii nappo bivde lobiheamet, vaikke guollebivdu Deanus ja dan oalgečázádagain gullá sámi eallinvuohkái. Suoma vuođđolága mielde sámiin lea vuoigatvuohta doalahit iežaset eallinvuogi, ja dán vuoigatvuhtii gullá maiddái guollebivdu.
Bivdit ledje Veahčajoga oasusgotti ságadoalli Anne Nuorgam, oasusgotti čálli Kati Eriksen ja su 17-jahkásaš gánda Erke Eriksen ja oasusgotti ovddit ságadoalli Heidi Eriksen.
- Dát guollebivdit leat doaibmagoahtán ná, daningo sis lea ulbmilin nuppástuhttit guolástanlága, daningo láhka ii vástit sámiid riekteáddejumi. Lágat galggašedje leat dakkárat, ahte dat adnojuvvojit vuoiggalažžan. Guovllu sámiin lea vuoigatvuohta bivdit Deanu čázádagas, masa lohkkojit maiddái ng. stáhta čáhceviidodagat, muitala Sámi olmmošvuoigatvuođaid searvi rsALVA oktavuođaolmmoš Aslak Pieski.
-Gažaldat lea viidásut áššis, go dušše guollebivddus. Lea sáhka sámiid rievttis eallit sápmelažžan ja ollašuhttit iežaset eallinvuogi. Guolástanárbevierut gullet sámi eallinvuohkái, daningo dat nannejit bearašoktavuođaid, giela, vieruid ja árbedieđu, Pieski joatká.
ALVA – Sámi olmmošvuoigatvuođaid searvi rslea jagi 2018 vuođđuduvvon searvi, man ulbmilin lea dorvvastit sámiid vuoigatvuođa doalahit, ollašuhttit ja ovddidit iežaset eallinvuogi ja maiddái doarjut ja ovddidit sámiid kultuvrralaš, gielalaš, sosiálalaš, vuoigatvuođalaš ja dábálaš ekonomalaš viggamušaid.
Riidu Deanu ja dan oalgejogaid guollebivddus buollái geasset 2017, go Deanu ođđa soahpamuš ja guolástanláhka bohte fápmui. Sápmelaččaid mielas stáhta guollebivddu stivren lea mannan menddo guhká, daningo Deanu soahpamuša mielde árbevirolaš fierbmebivdu lea gáržžiduvvon measta 80 % ja oalgejogaid bivdu lea geavadis gildojuvvon stáhta čáziin.
Lassedieđut: Aslak Pieski, +358 40 5154 207
www.samihumanrights.org
VIDEO: Hábmemin vuoiggalašvuođa - Manin mii dáistalit // Creating Justice - Why We Fight